محمد الروبى
بفعل فاعل رميتى حملك عاللى اصلا حمله مايل
وعشان بنيتى بدون اساس
المبنى كله للاسف لسقوطه ايل
وزعتى عالمساكين سراب
طرح السراب والطرح طاب
والهم كان قادر وطايل
وكل واحد خد مناب
باعك وساب وبقيت انا لوحدى اللى شايل
ولما زاد الحمل بهمومك
هويت بتعنفينى كانى خنتك او جنيت
وكانى كان لازم اجمل او اجامل
طلع الكلام من فمى على هيئة سكوت
اصرخ سكوت يبان سكوتى
كان عطفك عطف شامل
واما السكوت بقى حاجه من اعظم سماتى
صبح الكلام ممنوع ولو حتى ف صلاتى
فتموت صلاتى ودمها عالارض سايل جوايا
مات الحلم ومحيتى الامل كان السؤال ايه العمل
مليون سؤال ولا حد جاوب عاللى سائل
وتعشمينى ببكره استنى النهار
فيبات شعاع الشمس تايه فى المدار
وتبات عيونى على الوجع يصحى الوجع فيا جدايل
ايه اللى يجبرنى اعشقك وانت اللى تايهه ف مشرقك
سجن الغروب حواليكى حايل
بتعلمينى ازاى احبك بالعصا
وبتضربلى كام مثل باللى عصى
فازاى احبك وانتى حبك حب قاتل
بس الغريب انى بحبك ماعرفش ليه
لكن بحبك رغم انى عارفك عاشقه غيرى
وبرضه قابل ماهوا لما حتى الام تمنع صدرها
عمر الرضيع مايحس قسوة صدها
ولحضنها يفضل يقاتل
